Bəylər Əyyubovun qardaşı uşaqları Azərbaycanda bütün varidatımı əlimdən aldılar” – FOTO fakt


Bir müddət bundan öncə Türkiyə vətəndaşı, 41 yaşlı Ali Osman Kutanoğlunun üç azərbaycanlı biznesmenin külli miqdarda vəsaitini alıb mənimsədiyinə görə həbs olunması haqqında xəbər vermişdik.

Türkiyə mətbuatında bildirilirdi ki, Kutanoğlu 2002-ci ildə Azərbaycan universitetlərindən birində oxuyarkən iş adamları R.E., Ş.E. və E.F.A. ilə tanış olub. İddiaya görə 2015-ci ildə o, həmin iş adamlarını inandırıb ki, məşhur tikinti maqnatı Ali Ağaoğlunun inşa etdirdiyi yaşayış binalarında mənzilləri satın alaraq sonradan daha baha satmaqla, habelə Almaniyadan lüks avtomobillər gətirməklə böyük pullar qazanmaq olar. Həmin vədlərə inanan azərbaycanlı biznesmenlər Kutanoğlu ilə anlaşıb, onlar türkiyəli dələduza müəyyən fasilələrlə cəmi 1 milyon 240 min avro pul veriblər. Ali Osman Kutanoğlu azərbaycanlı iş adamlarını vəd etdiyi işləri görəcəyinə inandıraq bir müddət “fırladıb”. Aldığı pulları geri qaytarmaqdan yayınıb. Pullardan ümidlərini kəsən biznesmenlər İstanbula gedərək Ali Osman Kutanoğlu haqqında dələduzluqla bağlı prokurorluğa şikayət ediblər. İstanbul Cümhuriyyət Prokurorluğu şikayət əsasında təhqiqat başladıb. Habelə iş adamları Azərbaycan Ədliyyə Nazirliyi vasitəsilə Kutanoğlunun barəsində İnterpol xətti ilə beynəlxalq axtarış elan edilməsinə nail olublar. Ali Osman Kutanoğlu Ankarada yaxalanıb və İstanbula aparılıb. O, ifadəsində azərbaycanlı iş adamlarından pul aldığını etiraf edib, ancaq “bəzi problemlər” üzündən işlərinin alınmadığını və layihələrə həyata keçirə bilmədiyini iddia edib. Onun barəsində həbs qətimkan tədbiri seçilib.

Amma Kutanoğlu redaksiyamıza müraciət edərək deyilənlərin yalan olduğunu, həbs edilmədiyini, bunun özünə qarşı şər olduğunu deyir. PressClub.Az-a danışan Kutanoğlu bildirib ki, əslində, söhbətin məğzi başqadır.

Türkiyə vətəndaşının dediklərini olduğu kimi dərc edirik: “Xəbərdə adları çəkilən Azərbaycan vətəndaşları, Robert Əyyubov, Şahin Əyyubov, Füzuli Adıgözəlov və mənəm. Mən Şahin və Füzuliyi 2002-ci ildən yox, 2010-cu ildə tanımışam. Roberti isə 2004-cü ildə.
Ağaoğlu məsələsinə gəlincə, Şahin Əyyubov 2013-cü ildə mənə zəng edərək, İstanbul şəhərində “Ağaoğlu maslak 1453″ layihəsində tikintidən ev almaq istədiyini dedi. Onunla İstanbula getməyimi və ev almasında köməklik etməyimi xahiş etdi. İstanbula getdik, ordan ev bəyəndi və aldı. Evin pulunu mənim bank hesabımdan köçürmə yolu ilə mən etdim. Hazırda da mənim pulumu ödəməyib. Ev də hazırda Şahin Əyyubovun öz adınadır”.

480 min avroya almaq istədikləri “Mercedes”in yeni modelindən 2 ədəd

Kutanoğlu Almaniyadan maşın məsələsinə də toxunub: “2015-ci ilin avqust ayında Bodrumda tətildə olan Füzuli və Şahin mənə zəng etdilər, məndən “Mercedes”in yeni modelinin çıxacağını və yeni modeldən 2 dənəsini almaq istədiklərini söylədilər.

“Mercedes G500 4×4” modelin çox böyük olduğunu və Azərbaycanda çox diqqət çəkəcəyini dedim. Amma onlar israrla həmin maşından istədiklərini bildirdilər. Hər biri 240 min avro olan maşınların pulunu da İstanbulda yaşayan Füzulinin ortağı olan Nürəddindən alacağımı söylədilər. Mən də bunların sözlərinə inanıb, “Mercedes”ləri sifariş verdim, 480 min avro da Almaniyaya göndərdim. Sonra Füzuli mənə “Nürəddində pul yoxdu, maşınları almırıq” dedi. Mən də çox ziyana düşəcəyimi, durduğum yerdə 480 min avro mənə niyə ödətdiklərini soruşdum. Şahin Əyyubov mənə “mən səndən maşın istədim?” deyəndə əsəbiləşdim. Axı Şahin, sən deyildinmi Bodrumda olanda mənə 20 dəfə zəng edib, maşını sifariş verdirən. Bundan sonra təxmin edəcəyiniz söyüşlər, davalar keçdi aramızda. Mən də canım qədər çox sevdiyim Azərbaycandan ayrılmağa məcbur oldum. Çünki Azərbaycanda bu adını saydığım adamlara polis, prokuror göz üstə qaşın var deyə bilmir. Elə təxmin etdiyim kimi də oldu. Heç bir məhkəmə olmadan, öz bildikləri kimi “məhkəmə qurdular”, cəzalandırılmağımı istədilər. Bütün Azərbaycan qurumlarına əlaqə nömrələrimi göndərməmə rəğmən, heç bir bildiriş göndərmədən, qərar qəbul etdilər.

Sizcə, İnterpolun Azərbaycan nümayəndəliyinin rəisi Əyyubovlara “yox” deyə bilər?

Digər yandan xəbərinizdə bildirilir ki, Kutanoğlu azərbaycanlı iş adamlarından pul aldığını etiraf edib, ancaq “bəzi problemlər” üzündən işlərinin alınmadığını və layihələrə həyata keçirə bilmədiyini iddia edib. Bu yalandır. Mənə hansısa sual verildi ki, belə də etiraf edim? Bu tamamən qaralama kampaniyasıdır, caamatı aldatmaq üçündür. Bu Əyyubovların hər zaman etdikləridir – Azərbaycan xalqını aldatmaq. Mən saxlanılmışam, amma bu məsələ ilə bağlı deyildi, başqa məsələ idi.

İnterpol məsələsinə gəlincə, bu gün İnterpol saytında ən çox axtarış verən ölkənin Azərbaycan olduğunu bilmək yetərlidir. Mənim adımın necə və hansı şəkildə İnterpola verildiyini təxmin edə bilmək elə də çətin deyil. Azərbaycanda Əyyubovlarla hansısa probleminiz varsa, İnterpolun axtarışına düşməyi gözə almalısınız. Sizcə, İnterpolun Azərbaycan nümayəndəliyinin rəisi Əyyubovlara “yox” deyə bilər? Bunun cavabını Azərbaycan xalqı məndən daha yaxşı bilir

25 ədəd texnika, 10 mənzil, 2 maşınıma və 1 milyon 100 min dolar

Məsələnin əsasından danışan Kutanoğlu deyir ki, problem Bəylər Əyyubovun qardaşı oğlu, Gəncənin Vergilər İdarəsinin rəisi Şahin və onun qardaşı Robert Əyyubovun Azərbaycanda 20 illik ticarət fəaliyyətinə və bütün mallarına “əl qoymasından” sonra başlayıb: “25 ədəd texnika, 10 mənzil, 2 maşınıma və 1 milyon 100 min dollarıma bunlar “əl qoydu”. Onların özləri haqqında Türkiyə məhkəməsində cinayət işi başlanılıb. Onlar da buna qarşılıq, qaralama məqsədi ilə, onlara aid səs yazılarını yazıb, guya onları şantaj edirəm bəhanəsi ilə, İstanbul prokurorluğuna müraciət ediblər. İstanbul prokurorluğu tərəfindən Əyyubovların iddiası incələndi və mənimlə bağlı əsaslı bir şey olmadığına görə, saxlanılmam haqqında qərar qüvvədən düşdü. Araşdırma aparılarkən də, qanuna uyğun olaraq, həbsdə saxlanıldım. Mənə hazırda hansısa prokurorluqda, ya da məhkəmədə cinayət işi açılmayıb. Faktiki olaraq, Ankarada öz işlərimin başındayam. Sizin saytınızda gedən məqalədə göstərildiyi kimi, “pul məsələsi”nə görə, heç vaxt saxlanılmadım, tutulmadım. Bu, sadəcə, Əyyubovların Türkiyədəki qəzetlərə pul qarşılığında yayımlatdığı yalan xəbərlərdir. İndi bu xəbərləri yaydıranlar, “pula görə saxlanılma” sənədlərini nəyə görə ortaya çıxara bilmirlər? Çünki bunların hamısı yalandır. Məsələ ilə bağlı yaxınlarda video müraciətim olacaq. Türkiyədəki qəzetlərin saytları sənədləri, faktları göstərdikdən sonra yazıları saytlarından çıxardılar. Çox xahiş edirəm ki, məsələ ilə bağlı mənim dediklərimi yayın, fikirlərimi yayın və hər kəs məsələnin nə olduğunu bilsin”.